ບໍລິສັດ ທີວາຍເອສເຄ ໂຮລດິ້ງ ຈຳກັດ (TYSK) ຮ່ວມມືກັບ ບໍລິສັດຫຼັກຊັບ ແອລ໌ດີບີ ຈຳກັດຜູ້ດຽວ (LDB-S) ລົງນາມເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຂໍ້ມູນຂອງບໍລິສັດ TYSK ໃນການກະກຽມຄວາມພ້ອມອອກຈຳໜ່າຍຮຸ້ນໃຫ້ແກ່ມວນຊົນຄັ້ງທຳອິດ IPO. ໃນຕອນເຊົ້າ, ວັນທີ 30 ກັນຍາ 2025 ທີ່ ທະນາຄານ ພັດທະນາລາວ ສາຂາພາກນະຄອນຫຼວງ, ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ບໍລິສັດ ທີວາຍເອສເຄ ໂຮລດິ້ງ ຈຳກັດ (TYSK) ແລະ ບໍລິສັດຫຼັກຊັບ ແອລ໌ດີບີ ຈຳກັດຜູ້ດຽວ (LDB-S) ໂດຍການລົງນາມຂອງ ທ່ານ ນາງ ກຸຫຼາບ ແສງພະຈັນ, ຜູ້ບໍລິຫານ ບໍລິສັດ TYSK ແລະ ທ່ານ ນາງ ວິໄລທອງ ທຳມະວົງສາ ຜູ້ອໍານວຍການ ບໍລິສັດຫຼັກຊັບ LDB. ພ້ອມນີ້, ກໍ່ຍັງມີ ທ່ານ ວຽງຄຳ ວັນສີລາລົມ ປະທານສະພາບໍລິຫານ ບໍລິສັດຫຼັກຊັບ LDB ພ້ອມດ້ວຍຄະນະຜູ້ບໍລິຫານ, ຄະນະພະແນກ ແລະ ພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພະຍານ, ຈຸດປະສົງຂອງການເຊັນ ໃນຄັ້ງນີ້ ແມ່ນເພື່ອໃຫ້ ບໍລິສັດ LDB-S ເຂົ້າໄປສຶກສາຂໍ້ມູນ ແລະ ໃຫ້ຄຳປຶກສາທາງດ້ານການເງິນ ແກ່ບໍລິສັດ TYSK ຊຶ່ງປະກອບມີບໍລິສັດໃນເຄືອຫຼາຍແຫ່ງເປັນຕົ້ນແມ່ນ ບໍລິສັດ ຮຸ່ງໂຊກ ຈຳກັດ (ແບຣນເຂົ້າໜົມລາວ) ເພື່ອກະກຽມລະດົມທຶນຜ່ານຊ່ອງທາງຕະຫຼາດທຶນລາວ ກໍ່ຄືການອອກຈຳໜ່າຍຮຸ້ນໃຫ້ແກ່ມວນຊົນຄັ້ງທຳອິດ IPO.