ໃນຕອນເຊົ້າ, ວັນທີ 21 ກໍລະກົດ 2026 ທີ່ຕະຫຼາດຫຼັກຊັບລາວ, ໄດ້ຈັດພິທີເຊັນບົດບັນທຶກການຮ່ວມມື (MOU) 3 ຝ່າຍ ລະຫວ່າງ ຄະນະປະຕິຮູບລັດວິສາຫະກິດ ຕາງໜ້າໂດຍ ຫ້ອງການຄະນະປະຕິຮູບລັດວິສາຫະກິດ (ຫ້ອງການ ຄປລກ) ຮ່ວມກັບ ສໍານັກງານ ຄະນະກຳມະການຄຸ້ມຄອງຫຼັກຊັບ (ສຄຄຊ) ແລະ ກຸ່ມບໍລິສັດຫຼັກຊັບ ຄື: ບໍລິສັດຫຼັກຊັບ ແອລດີບີ ຈຳກັດຜູ້ດຽວ (LDB-S), ບໍລິສັດຫຼັກຊັບ ທຄຕລ-ກທ ຈຳກັດ (BCEL-KT), ບໍລິສັດຫຼັກ ຊັບ ລາວ-ຈີນ ມະຫາຊົນ (LCS) ແລະ ບໍລິສັດຫຼັກຊັບ ເອພີເອັມ ລາວ ຈຳກັດ (APMLAO). ພິທີດັ່ງກ່າວ ໄດ້ຮັບ ກຽດເຂົ້າຮ່ວມ ແລະ ຂຶ້ນເປັນສັກຂີພະຍານໂດຍ ທ່ານ ຮອງຫົວໜ້າຫ້ອງວ່າການສູນກາງພັກ, ທ່ານ ຮອງຜູ້ວ່າການ ທະນາຄານແຫ່ງ ສປປ ລາວ, ຄະນະປະຕິຮູບລັດວິສາຫະກິດແຕ່ລະກະຊວງ, ຜູ້ອໍານວຍການໃຫຍ່ ຕະຫຼາດຫຼັກຊັບລາວ, ພ້ອມດ້ວຍບັນດາທ່ານຄະນະກົມ ຈາກທະນາຄານແຫ່ງ ສປປ ລາວ.

ການເຊັນ MOU ໃນຄັ້ງນີ້ ແມ່ນການຍົກລະດັບ ແລະ ສືບຕໍ່ຂອບເຂດການຮ່ວມມື ຈາກບົດບັນທຶກການຮ່ວມ ມືສອງຝ່າຍ (MOU) ສະບັບລົງວັນທີ 29 ພຶດສະພາ 2025 ເຊິ່ງການຮ່ວມມືໃນຮອບໃໝ່ນີ້ ໄດ້ຂະຫຍາຍມາເປັນການ ຮ່ວມມືສາມຝ່າຍ ຢ່າງເຕັມຮູບແບບ ເພື່ອໃຫ້ສອດຄ່ອງກັບການມອບ-ໂອນວຽກງານຄຸ້ມຄອງວິສາຫະກິດລັດລົງທຶນ ມາ ຂຶ້ນກັບ ຫ້ອງການ ຄປລກ ໂດຍກົງຕາມແຜນປະຕິຮູບຂອງລັດຖະບານ ໂດຍມີ ສຄຄຊ ເຂົ້າມາເປັນຝ່າຍທີສາມໃນ MOU ສະບັບໃໝ່ນີ້ ຖືເປັນ ກົນລະຍຸດສໍາຄັນໃນການເຊື່ອມຕໍ່ລະຫວ່າງ ພາກສ່ວນກໍານົດນະໂຍບາຍປະຕິຮູບ (ຄະນະປະຕິຮູບລັດວິສາຫະກິດ ຕາງໜ້າໂດຍ ຫ້ອງການ ຄປລກ), ພາກສ່ວນຄຸ້ມຄອງກົດລະບຽບຕະຫຼາດທຶນ (ສຄຄຊ) ແລະ ພາກສ່ວນປະຕິບັດງານຕົວຈິງ (ກຸ່ມບໍລິສັດຫຼັກຊັບ).

MOU ໃນຄັ້ງນີ້ ມີຈຸດປະສົງເພື່ອເປັນການສ້າງຄວາມເຂັ້ມແຂງໃຫ້ແກ່ບັນດາວິສາຫະກິດລັດລົງທຶນ “ລັດວິສາຫະກິດ” ໃນວຽກງານການປະເມີນມູນຄ່າຮຸ້ນ ໃຫ້ກັບບັນດາລັດວິສາຫະກິດ ທີ່ມີຈຸດປະສົງໃນການປັບປຸງໂຄງສ້າງ ຫຼື ຊອກຫາຄູ່ຮ່ວມຍຸດທະສາດ ລວມທັງວຽກງານການຈັດບູລິມະສິດໃຫ້ແກ່ບັນດາລັດວິສາຫະກິດທີ່ມີເງື່ອນໄຂ ແລະ ຄວາມພ້ອມ, ປັບປຸງ ແລະ ຊຸກຍູ້ສົ່ງເສີມໃຫ້ແກ່ບັນດາລັດວິສາຫະກິດທີ່ຄຸ້ມຄອງໂດຍ ຫ້ອງການ ຄປລກ ເພື່ອໃຫ້ ສາມາດເຂົ້າຈົດທະບຽນໃນຕະຫຼາດຫຼັກຊັບລາວ.

ທິດທາງແຜນການຮ່ວມມືກັນໃນຕໍ່ໜ້າ ແມ່ນຈະສືບຕໍ່ວຽກງານທີ່ໄດ້ຈັດຕັ້ງປະຕິບັດໃນໄລຍະທີ່ຜ່ານມາ ໂດຍ ອີງຕາມເນື້ອໃນທີ່ລະບຸໃນຂອບເຂດການຮ່ວມມືກັນໃນບົດບັນທຶກ MOU ເປັນຕົ້ນແມ່ນ: ເປັນທີ່ປຶກສາດ້ານການເງິນ ໃຫ້ແກ່ລັດວິສາຫະກິດ ເພື່ອກຽມພ້ອມໃນການເຂົ້າຈົດທະບຽນ ໃນຕະຫຼາດຫຼັກຊັບລາວ, ການປະເມີນມູນຄ່າຮຸ້ນ ແລະຖານະການເງິນ ເພື່ອໃຊ້ເປັນບ່ອນອີງພື້ນຖານໃນການປັບປຸງໂຄງສ້າງລັດວິສາຫະກິດ ລວມທັງ ສ້າງຄວາມເຂັ້ມແຂງໃຫ້ ແກ່ຄະນະປະຕິຮູບລັດວິສາຫະກິດ ແລະ ຫ້ອງການ ຄປລກ ໂດຍຜ່ານການຝຶກອົບຮົມແບບເຈາະລຶກ ເພື່ອເປັນການສືບຕໍ່ ແລະ ຍົກລະດັບການຮ່ວມມືໃຫ້ມີຄວາມເລິກເຊິ່ງກວ່າເກົ່າ, ທັງສາມຝ່າຍຈຶ່ງໄດ້ຕົກລົງເຫັນດີຮ່ວມກັນ ສ້າງຂອບການ ຮ່ວມມືສາມຝ່າຍນີ້ຂຶ້ນ ເຊິ່ງມີກຳນົດໄລຍະເວລາການຮ່ວມມື 3 ປີ (2026-2029). ຄາດໝາຍຂອງຜົນທີ່ໄດ້ຮັບໃນການຮ່ວມມື ເພື່ອຮັບປະກັນໃຫ້ລັດວິສາຫະກິດ ມີຄວາມເຂັ້ມແຂງ, ຍົກລະດັບ ການບໍລິຫານຈັດການໃຫ້ມີປະສິດທິພາບ, ມີຄວາມໂປ່ງໃສ, ມີຄວາມເປັນມືອາຊີບ ແລະ ຍົກສູງຂີດຄວາມສາມາດໃນ ການແຂ່ງຂັນ. ເປົ້າໝາຍສູງສຸດຄືການກະກຽມຄວາມພ້ອມໃຫ້ແກ່ບັນດາລັດວິສາຫະກິດ ໃຫ້ສາມາດເຂົ້າເຖິງແຫຼ່ງທຶນ ແລະ ພັດທະນາຕົນເອງໃຫ້ກາຍເປັນອົງກອນທີ່ເຂັ້ມແຂງ, ພ້ອມທີ່ຈະເປັນກຳລັງແຮງຫຼັກໃນການຂັບເຄື່ອນເສດຖະກິດ ຂອງຊາດ.